Сараптамалық комиссияның өкілдері бірауыздан тұрғын үй құрылысын дамытудың 2008-2010 жылдарға арналған бағдарламасы талапқа сай емес, атқарушы органдар өрескел заңбұзушылықтарға жол берген деген шешімге табан тіреді.

Біреулер жылдап кезекке тұрып жүйкесі жұқар-ып жүрсе, пысықайлар бармақ басты, көз қысты әрекеттерге басып, қулықтарын іске асырған. Павлодар облысында «Қалалық коммуналдық шаруашылығы» кәсіпорны пәтерлерді кезексіз таратқан. Тіпті құдайын ұмытқандары сондай, баспана алғандардың құжаттары болмай шыққан. «Нұр Отан» партиясының сын садағына олардан бөлек, Оңтүстік Қазақстан облысының Арыс қаласы, Ордабасы, Сарыағаш, Сайран, Мақтаарал аудандары ілікті. Бұл өлкелерде жең ұшынан жалғасып, тамыр-танысына бұра тарту оқиғалары көрініс берген. Тағы бір қызығы, Сайран ауданында 2010 жылға дейін баспанаға мұқтаж жандарды кезекке қою жүйесі болмаған көрінеді. Ол аз десең, аудандық коммуналдық шаруашылық бөлімінің қызметкерлері 5 пәтердің кімге берілгені туралы құжатты көрсете алмағаны масқара емес пе?! «Нұр Отанның» нұрлы істері елім деп еңіреген партияларға үлгі болса қанеки. Тұрғын үй мәселесіне ден қойып, комиссия құруының өзі құптарлық іс. Еркінсіп кеткен «еркелер» енді айылын жиатын шығар. «Ештен кеш жақсы» деген осы. «Нұротандықтардың» айтуынша, заңбұзушылықтың көкесі Астана қаласында екен. Мұндағы пәтерге мұқтаж жандар кезегі екі есеге артқан. Комиссия тексеру барысында 2008-2010 жылдар аралығында 1130 пәтер берілгенін, оның 78 пайызы кезек тәртібін сақтамастан «қалалық жылжымайтын мүлік» мекемесі арқылы таратылғанын анықтаған. Бассыздық мұнымен шектеліп қалса жақсы ғой. Сорақысы әлі алда екен. 125 пәтер әкімшілік пен оған қарасты мекеме қызметкерлеріне берілген деп көрсетілген. Тексере келгенде, 45 адам ғана кезекте тұрғаны дәлелденген. Сонда қалғандары пәтерге заңсыз қол жеткізгендер емей кімдер? Осындай келеңсіз істердің артына «шам» алып түскен «Нұр Отан» партиясы, халықтың арыз-шағымына көңіл аударып, «жоқтаушысы» болуға жарайтынын тағы көрсетті. Отырысқа есеп беруге келген қала әкімінің бірінші орынбасары Харошон Сергей Михайлович «жеткен жетістіктерін» айтып біраз «мақтанып» алмақ еді, оның «еркелігін» комиссия мүшелері көтере алмай тарпа бас салды. Бұршақтай жауған сұрақтан Сергей Михайлович жалтара алмай қара терге түсті. Ақталып, кей сұрақтарға тоқталып, «қиыннан қиыстырып» жол тауып шыққысы-ақ келді. Өкінішке орай, «буып, алды-артын орап тастаған» сұрақтарға ашылып ештеңе айта алмады. Мұны көріп отырған «Нұр Отан» партиясы төрағасының орынбасары Нұрлан Нығматулиннің: «Президентіміз Астанада жедел тұрғын үй салу үшін барлық жағдайды жасап отыр. Үкіметте өте үлкен қаржы бөлді. Соған қарамастан Астанада пәтер кезегінде тұрған мемлекеттік қызметкерлер мен жас отбасылар саны жылдан-жылға артып келеді. Тексеру барысында Астана әкімшілігі үйлерді заңсыз таратқаны әшкереленді. Бір емес, 181 пәтер әлеуметтік топқа да, мемлекеттік қызметкерге де жатпайтын адамдарға берілген. Атап айтсам, серіктестік басшыларына, акционерлік қоғам қызметкерлеріне, зиялы қауым өкілдеріне, бастықтың жүргізушісіне, т.б. Шынтуайтына келгенде, бұл үйлер оларға емес, қарапайым мемлекеттік қызметкерлерге берілуі керек еді. Менің түсінгенім, сендер қаланы бөліп алып, жеке билік жүргізіп жатқан секілдісіңдер. Мемлекет мүлкін таратуда жекеменшік затыңды үлестіретіндей, еркінсінулеріңді қалай түсінуге болады? Қоғамды сыйламау — барып тұрған бассыздық», — деп аяқтаған өткір-өткір сөздері әділдік іздеген көпшіліктің көңілін көтеріп тастағаны анық.