Түрік парламенті бұған қатысты заңды 15 шілдеде бекіткен. Оған президент Абдулла Гүл де қол қойған болатын. Халықтық-республикалық партия өкілдерінің айтуынша, бұл жерде тендер өткізіп, оның қорытындысы бойынша келісім жасау қажеттілігі туралы заң өрескел бұзылған. «Үкімет онысын бүркемелеу үшін халықаралық акт ретінде бұл келісімге жоғары мәртебе беріп отыр. Бұл – АЭС құрылысын бақылаусыз қалдырды деген сөз» деп есептейді оппозициялық партия.

Түріктің конституциялық сотына жолдайтын шағымда бұл партия осы орыс-түрік келісімінің құқықтық мемлекет принциптеріне қайшы келетінін баса көрсетпек.

«АЭС салу – мемлекетаралық келісім мәселесі емес. Бұл үшін тендер қорытындысы бойынша келісім жасалу-ға тиіс. Қолданыстағы заңға қайшы болғандықтан, Конституциялық сотта шағым түсіреміз», – дейді ХРП-ның парламент фракциясының басшысының орынбасары Мехмет Хамзаджеби.

Оппозиция мәлімдемесіне қатысты министрлер кабинеті әзірге ешқандай уәж айтқан жоқ. Түрік АЭС жобасы төрт қуат блогынан тұрады. Олардың әрқайсысының күші – 1,2 ГВт. Келісім бойынша, жобалық компания құрылуға тиіс. Оның құрылтайшысы ресейлік жақ өкілеттілік ететін мекемелер болмақ. АЭС құны 20 миллиард долларға жетуі ықтимал. Келісімшарт бойынша, жобаны жүзеге асырудың алғашқы кезеңінде ресейліктер қаржыландырса, уақыт өте келе инвесторларды Түркияның өзінен және басқа да елдерден тартпақ.