М.О.Әуезов атындағы Әдебиет және өнер институтының директоры, ҚР ҰҒА академигі С.А.Қасқабасов: «М.Әуезов атындағы инс-титутымыз 50 жылда өзінің жеткен табыстарын, жасаған жұмыстарын осы мерейтойда көрсетті. Біз көптеген кітаптар шығардық. Біздің институт тарихын екі үлкен дәуірге бөлуге болады. Біреуі — Кеңестік кезең, екіншісі — тәуелсіздік алғаннан кейінгі кезең.Кеңестік дәуірде де көп жұмыс жасалды. Үш томдық батырлар, үш томдық айтыс,шешендік сөздер, мақал-мәтелдер жарық көрді. Үш томдық «Қазақ әдебиеті тарихы» қазақша, орысша шықты. Ол кездері көп жұмыс жасалды. Бірақ ол кезеңнің кемшілігі — бәрі біржақты болды. Цензура жібермейтін. Талай қиындықтар болды. Тәуелсіздіктің алғашқы жылдары қаржылық жағынан қиындықтар туды, соның салдарынан көптеген дарынды ғалымдар сыртқа кетіп қалды. Дегенмен, 20 жылда 200-ден астам кітап шығардық. Оның ішінде 100 томдық бабалар сөзінің 70 томы, 10 томдық «Әдебиет тарихы»,3 томдық «Өнер тарихы», 8 томдық «Қазақ музыка антологиясы», 20 томдық «Әдеби жәдігерлер» т.б. шығып жатыр», — деді.
Бұл басқосуда еліміздің бетке ұстар зиялы қауымы және Ресей, Татарстан, Башқұртстан, Түркия, Корея, Өзбекстан т.б. елдерден ғалымдар қатысып, қазақ әдебиеті мен фольклорын, өнерін зерттейтін бас ғылыми мекемені мерейтойымен құттықтап, әдебиеттану мен өнертанудың өзекті мәселелері бойынша баяндама жасады. Сонымен қатар, М.О. Әуезов шығармаларының 50 томдық академиялық басылымының тұсаукесері өтіп, ұлы жазушының ескерткішіне гүл шоқтары қойылды.
