Жақында Атырау облыстық ІІД Балық қорына қылмыстық қол сұғушылыққа қарсы күрес бөлімінің қызметкерлері мен жол полициясы инспекторлары гаражды қара уылдырық дайындайтын шағын цехқа айналдырған заң бұзушыны анықтады. Гараж қаланың Беккалиев атындағы көшеде, үй ауласына орналасыпты. Тексеру барысында қолдан дайындалып, пластмассалық ыдыстарға салынған 16 дана қара уылдырық, едәуір көп мөлшерлі ас тұзы, электондық таразы, уылдырық дайындайтын сүзгіштер, сондай-ақ, 450 дана пластмасса, темір құтылар табылған. Мұнан басқа 100 ден астам кептірілген қаракөз балықтары тәркіленді. Қазіргі уақытта осы тәркіленген уылдырықтың иесі анықталуда, қылмыстық іс көтеру мәселесі шешілуде.
Науқандық шараның осыған дейінгі аралығында су полициясы қызметкерлері заңды белінен басқандардан 10 тоннадан астам балықты кері қайтарып,140 ау құралдарын жинап алған. Браконьерлерден тәркіленген су маржанының 300 келісі аса бағалы бекіре тұқымдас балықтар. 130 дан астам заң бұзған азаматтар жауапталып, олардың 20 дан астамының үстінен қылмыстық іс қозғалды, 100-і әкімшілік жазаға тартылды.
